Արգենտինայում ծայրահեղ աջ քաղաքական գործիչ համարվող Խավիեր Միլեյը, ով երկրի նախագահական ընտրությունների երկրորդ փուլի ֆավորիտ չէր համարվում, անսպասելիորեն հաղթել է՝ հավաքելով ձայների ավելի քան 56%-ը։ Նրա մրցակիցը՝ էկոնոմիկայի նախարար Սերխիո Մասսան ընդունել է պարտությունը և հաջողություն մաղթել նոր ղեկավարին։
«Ակնհայտ է, որ արդյունքներն այն չէին, ինչ ակնկալում էինք, և ես խոսեցի Խավիեր Մայլիի հետ՝ շնորհավորելու նրան և բարին մաղթելու, քանի որ նա այն նախագահն է, որին արգենտինացիների մեծամասնությունը ընտրել է առաջիկա չորս տարիների համար»,-ասել է Մասսան:
53-ամյա գզգզված մազերով և խիտ բակեննարդներով TikTok աստղին, երաժիշտին, տնտեսագետին և հեռուստահաղորդավարին արգենտիանցիենրը համեմատում են ԱՄՆ նախկին նախագահ Դոնալդ Թրամփի և Բրազիլիայի նախկին նախագահ Ժաիր Բոլսոնարոյի հետ՝ իր կտրուկ ոճի և հակասական հայտարարությունների պատճառով:
Իր ելույթներում Խավիեր Միլեյը, մասնավորապես, կոչ է արել «դեն նետել հիվանդ պեսոն [արգենտինական դրամական միավորը] հանուն ԱՄՆ դոլարի» և խոստացել այրել Կենտրոնական բանկը՝ «գնաճի քաղցկեղին» վերջ տալու համար։
Ինչպես հիշեցնում է AFP-ն, Միլեյը դեմ է արտահայտվել հղիության արհեստական ընդհատմանը, կողմ է հրազեն կրելուն, խոստացել է խզել հարաբերությունները Արգենտինայի հիմնական առևտրային գործընկերների՝ Չինաստանի և Բրազիլիայի հետ հանուն ԱՄՆ-ի, կասկածի տակ է դրել ռազմական բռնապետության տարիներին ռեպրեսիաների ենթարկվածների և զոհերի թիվը, ինչպես նաև պնդումներ կատարել, որ կլիմայի փոփոխությունը պայմանավորված չէ մարդկային գործունեությամբ։ Բացի այս ամենին նաև կասկածելի է անվանել երկրի՝ BRICS-ին (Բրազիլիա, Ռուսաստան, Հնդկաստան, Չինաստան և Հարավային Աֆրիկա)՝ աշխարհի խոշորագույն ոչ արևմտյան տնտեսությունների ակումբին միանալու անհրաժեշտությունը:
Նախագահական ընտրությունների երկրորդ փուլից առաջ նա մեղմացրել էր իր հռետորաբանությունը՝ ավելի չափավոր ընտրողներին գրավելու համար, սակայն նախընտրական քարոզարշավի սկզբում նա բեմ էր բարձրացել բենզասղոցով, որը խորհրդանշում է այն արմատական փոփոխությունները, որոնք նա նախատեսում է բերել տնտեսապես անհանգիստ վիճակին:
Արգենտինայում նախագահական ընտրությունները անցակացվել են ծանր տնտեսական ճգնաժամի պայմաններում, երբ գնաճը կազմում է շուրջ 140%, իսկ յուրաքնաչյուր հինգ արգենտինացիներից երկուսը ապրում են ծայրահեղ աղքատության մեջ:
Բրազիլիայի նախագահ Լուիս Ինասիո Լուլա դա Սիլվան, ում Միլեյը նախընտրական քարոզարշավի ժամանակ անվանել էր «չար կոմունիստ», առաջիններից մեկն էր, ով հաջողություն էր մաղթել նոր իշխանություններին։
«Արգենտինան մեծ երկիր է և արժանի է մեր հարգանքին։ Բրազիլիան միշտ պատրաստ կլինի աշխատել մեր արգենտինացի եղբայրների հետ»,-գրել էր նախագահը իր X սոցիալական ցանցի էջում:
Կոլումբիայի նախագահ Գուստավո Պեդրոն էլ հայտարարել է, որ ընտրությունների արդյունքները «տխուր են Լատինական Ամերիկայի համար»:
«Նեոլիբերալիզմն այլևս ոչինչ չունի առաջարկելու հասարակությանը, այն չի կարող պատասխանել մարդկության ներկայիս խնդիրներին»,-հայտարարել էր Պեդրոն:
Չիլիի նախագահ Գաբրիել Բորիչը ասել էր, որ ողջունում է Միլեյի հաղթանակը, իսկ Սերխիո Մասսային շնորհակալություն հայտնել իր պարտության արժանապատիվ ճանաչման համար։
«Արգենտինայի ժողովրդին մաղթում եմ ամենայն բարիք և գիտեմ, որ նրանք միշտ ունենալու են մեր հարգանքն ու աջակցությունը»,-գրել էր իր թվիթերյան էջում Բորիչը:
Միլեյին շնորհավորանքներ էր ուղղել նաև Դոնալդ Թրամփը:
«Ամբողջ աշխարհը դիտում էր! Ես շատ հպարտ եմ քեզնով։ Դուք շրջես քո երկիրը և իսկապես Արգենտինային նորից մեծ կդարձնես»,-ասվում է Թրամփի շնորհավորական ուղերձում:
Նոր նախագահը պաշտոնը կստանձնի դեկտեմբերի 10-ին։ Արգենտինայի ներկայիս նախագահ Ալբերտո Ֆերնանդեսն ասել է, որ պատրաստ է սկսել գործերը փոխանցել նոր առաջնորդին, սակայն չի շնորհավորել նրան հաղթանակի կապակցությամբ։
