Իսպանիայում սոցիալիստների առաջնորդ Պեդրո Սանչեսը ստացել է խորհրդարանի անդամների մեծամասնության աջակցությունը՝ նոր կառավարություն ձևավորելու համար։
Սանչեսի թեկնածությանը կողմ է քվեարկել 179 պատգամավոր, որոնց թվում են նաև կատալոնացի անջատողականների ներկայացուցիչները։ Դեմ են քվեարկել պահպանողականների ներկայացուցիչներ և ծայրահեղ աջ պատգամավորներ՝ ընդհանուր առմամբ 171 մարդ։
Սանչեսը նախկինում համաներում էր առաջարկել կատալոնացի քաղաքական գործիչներին, ովքեր վեց տարի առաջ մասնակցել էին տարածաշրջանի անկախության հասնելու փորձերին:
Իսպանիայի խորհրդարանը երկրի կառավարության ղեկավարին ընտրել է հուլիսյան խորհրդարանական ընտրություններից չորս ամիս անց։
Ընդդիմադիր աջ կենտրոնամետ «Ժողովրդական կուսակցությունը» (PP) ստացել էր ամենաշատ ձայները, իսկ իշխող իսպանական «Սոցիալիստական աշխատավորական կուսակցությունը»՝ Սանչեսի գլխավորությամբ (PSOE) հայտնվել էր երկրորդ տեղում։
Սակաայն այդ ժամանակ PP-ն խորհրդարանում չուներ բավականաչափ ձայներ՝ ծայրահեղ աջ «Ձայն» կուսակցության և այլ փոքր քաղաքական խմբերի աջակցությամբ կառավարություն ստեղծելու համար:
Սանչեսի համար հաղթանակը բավականին թանկ է արժեցել, քանի որ փոքր տարածաշրջանային կուսակցությունները, ներառյալ կատալոնացի և բասկ ազգայնականների կուսակցությունները, նրան օգնեցին ապահովել այն:
Սանչեսը և ձախակողմյան «Սումար» քաղաքական շարժման նրա գործընկերները համաձայնել են Կատալոնիայի անկախության կողմնակից երկու հիմնական կուսակցությունների՝ «Կատալոնիայի պրագմատիկ ձախ հանրապետականների» (ERC) և կոալիցիայի կոշտ գծին հետևող՝ «Միասին հանուն Կատալոնիայի» ներկայացրած պահանջներին: Այս քաղաքական ուժերը ձգտում էին համաներման հասնել Իսպանիայից անջատվելու կողմնակիցների համար։
Նման համաներման գաղափարը նախընտրական քարոզարշավի ժամանակ, սուր դժգոհություններ էր առաջացրել «Ժողովրդական կուսակցության» և «Ձայն» կուսակցության շրջանում։ Նրանք Սանչեսին մեղադրում էին կեղծավորության, անջատողականներին զիջումների և անձնական շահերը ազգայինից վեր դասելու մեջ։
Սանչեսն իր հերթին պնդում է, որ համաներումը թույլ կտա երկրին անցյալում թողնել տհաճ պահերը և շրջել պատմության այդ էջը։
«Հանուն Իսպանիայի և նրա շահերի, ինչպես նաև իսպանացիների ապագա բնականոն համակեցության համար, մենք պատրաստվում ենք համաներում շնորհել այն մարդկանց, ովքեր ներգրավված են դատական գործընթացների մեջ [Կատալոնիայի անկախության պայքարի համար]: Այս համաներումը ձեռնտու կլինի շատ մարդկանց, քաղաքական առաջնորդներին, որոնց տեսակետները ես չեմ կիսում և որոնց գործողությունները ես մերժում եմ, ինչպես նաև հարյուրավոր քաղաքացիների, ովքեր ներգրավված են եղել այս գործընթացում»,-հայտարրաել էր Սանչեսը խորհրդարանական քվերակությանը նախորդող բանավեճի ժամանակ։
Նա նաև ավելացրել է, որ այդ քայլերը հարձակում չէին Իսպանիայի սահմանադրության վրա, ինչպես պնդում էին նրա հակառակորդները, այլ ավելի շուտ «դրա ուժի ցուցադրությունն էր»:
Բայց «Ժողովրդական կուսակցության» նախագահ Ալբերտո Նունես Ֆեյխուն հինգշաբթի հայտարարել էր, որ այժմ, երբ Սանչեսը զիջումների է գնացել անկախության շարժմանը, «վառվել են ողովրդավարության համար ահազանգ հնչեցնող բոլոր լամպերը»:
Նրա կարծիքով Սանչեսի համաներումը հնարավորություն կընձեռի անգամ ազատ արձակել Կատալոնիայի նախկին ղեկավար Կառլոս Պուչդեմոնին, ով 2017 թվականին անկախության շարժման ծավալելուց և տապալումից հետո ստիպված էր եղել հեռանալ Բելգիա:
«Խնդիրը ձեր մեջ է: Դուք և անկարողությունը տեր կանգնելու ձեր տված խոստման պահպանման անընդունակությունը, բարոյական սահմանների բացակայությունը և պաթոլոգիական նկրտումները: Քանի դեռ դուք այստեղ եք, Իսպանիան դատապարտված կլինի պառակտման։ Վարչապետի պաշտոնում ձեր ժամանակը կնշանավորվի Պուչդեմոնի ազատ վերադարձով Կատալոնիա, և պատմությունը ձեզ համաներում չի շնորհի»,-ասել էր Ֆեյխուն:
Դաշնակիցները նույնպես քննադատել են Սանչեսին։ «Միասին հանուն Կատալոնիայի» կոալիցիան, որը վրդովված է այն ժամանակվա վարչապետի պաշտոնականտար հանդիսացած Սանչեսի «միացյալ Իսպանիայի» մասին հիշատակումից, նրան խորհուրդ է տվել «չգայթակղել ճակատագրին»: Նա նախազգուշացրել է, որ իր փոքրամասնության կոալիցիոն կառավարությանն աջակցությունն անվերապահ չի լինի, և որ յուրաքանչյուր հարց կորոշվի առանձին քննարկմամբ:
Երկուշաբթի օրը «Սոցիալիստական աշխատավորական կուսակցությունը» կողմից ներկայացված համաներման օրինագիծն ընդգրկում է 2012 թվականի հունվարի 1-ից մինչև 2023 թվականի նոյեմբերի 13-ն ընկած ժամանակահատվածը և ներառում է 2014 թվականի նոյեմբերին Կատալոնիայի անկախության վերաբերյալ խորհրդանշական խորհրդատվական հանրաքվեն, ինչպես նաև հետագա հանրաքվեն, որը տեղի ունեցավ երեք տարի անց և հանգեցրեց անկախություն հռչակագրի միակողմանի ընդունմանը:
Չնայած համաներումը թույլ կտա Պուչդեմոնին վերադառնալ Իսպանիա և վերացնել իր նախկին գործընկերներից մի քանիսի պետական պաշտոններ զբաղեցնելու արգելքը, սոցիալիստները այնուամենայնիվ փորձել են ընդգծել, որ ներման ակտն ավելի ընդհանուր բնույթ ունի:
Նրանք ասում են, որ դա կազդի դպրոցների տնօրենների վրա, ովքեր իրավական պատասխանատվության են ենթարկվել իրենց դպրոցները որպես հանրաքվեի ընտրատեղամաս օգտագործելու թույլտվության համար, ինչպես նաև քաղաքացիական ծառայողների, հրշեջների և ոստիկանների, որոնց գործողությունները անկախության հռչակումից հետո համարվում են անօրինական:
