Ուկրաինական բանակը ազատագրել է հերթական գյուղը Դոնեցկի մարզում
Ուկրաինայի զինված ուժերը ռուսական բանակի վերահսկողությունից ազատագրել են Դոնեցկի մարզի Բախմուտ քաղաքի մոտ գտնվող Կլեշչեևկա գյուղը: Այս մասին բրիտանական BBC-ի ուկրաինական ծառայությանը տված հարցազրույցում հաստատել է Ուկրաինայի Զինված ուժերի արևելյան խմբավորման մամուլի ծառայության ղեկավար, կապիտան Իլյա Եվլաշը։
«Մենք հաստատում ենք Կլեշչեևկա գյուղի ազատագրումը։ 80-րդ առանձին դեսանտա-գրոհային բրիգադը, 5-րդ առանձին գրոհային բրիգադի, ինչպես նաև ազգային ոստիկանության «Լյուտ» գրոհային ստորաբաժանումների կողմից: Կլեշչեևկան ազատագրվել է, նա ուկրաինական է»,-ասել էր Եվլաշը:
Ուկրաինայի նախագահ Վլադիմիր Զելենսկին երեկոյան իր ելույթում շնորհակալություն է հայտնել զինվորականներին գյուղն ազատագրելու համար։ Ուկրաինայի պաշտպանության փոխնախարար Աննա Մալյարն էլ հավելել է, որ այս գործողությանը մասնակցել է նաև 95-րդ օդադեսանտային գրոհային բրիգադը։
Ավելի վաղ Կլեշչեևկայի ազատագրման մասին հայտարարել էր Ուկրաինայի նախագահի աշխատակազմի ղեկավար Անդրեյ Երմակը՝ հրապարակելով գյուղի ավերված հին եկեղեցու մոտ կանգնած ուկրաինացի զինվորականների լուսանկարը:
Ուկրաինայի Զինված ուժերի գլխավոր շտաբը պաշտոնապես չի հայտարարել Կլեշչևկայի ազատագրման մասին, սակայն վերջին երկու օրվա ընթացքում ընդգծել է այս ուղղությունում զգալի հաջողությունների արձանագրման մասին։
ՌԴ պաշտպանության նախարարությունը կիրակի օրվա իր ամփոփագրում չի ներկայացրել Կլեշչեևկայում տիրող իրավիճակը։
Ռուս ռազմական լրագրողները պնդում են, որ Կլեշչևկայի մի մասը դեռևս գտնվում է այսպես կոչված «գորշ գոտում», իսկ Ուկրաինայի զինված ուժերը գրավել են միայն կենտրոնական հատվածը։
«Կլեշչեևկայի և Անդրեևկայի մերձակայքում՝ Սոլեդարի ուղղությամբ շարունակվում են կատաղի բախումները: Ավերված բնակավայրերը կողմերից ոչ մեկը ներկա պահին չի վերահսկում ամբողջությամբ»,-ասվում է «Рыбарь» թելեգրամյան ալիքի գրառման մեջ:
Հիշեցնենք, որ Ուկրաինան ուրբաթ օրը հայտարարել է Անդրեևկայի ազատագրման մասին, որը բավականին մոտ է գտնվում է ռուսական բանակի կողմից գրավված Բախմուտ քաղաքի մատակարարման գծերին։
Կլեշչևկայի և Անդրեևկայի նկատմամբ վերահսկողությունը թույլ է տալիս Ուկրաինայի զինված ուժերին շարունակել Բախմուտը շրջապատելուն ուղղված գործողությունը, քանի որ դա ավելի է մոտեցնում հարավից Բախմուտ տանող նյութատեխնիկական ուղիների արգելափակումը։
Դեռևս հուլիսի 25-ին Ուկրաինայի Զինված ուժերի արևելյան խմբավորման պաշտոնական ներկայացուցիչ Սերգեյ Չերևատին ասել էր, որ Անդրեևկայի հնարավոր ազատագրումը կբարելավի ուկրաինական ուժերի մարտավարական դիրքերը և հնարավոր կդարձնի շրջապատման ենթարկել Բախմուտը, կամ լավագույն դեպքում բնակավայրից ռուսների նահանջի արագացմանը կնպաստի։
«Անդրեևկան, ինչպես Բախմուտի մոտ գտնվող ցանկացած բնակավայր, որը կվերցվի, թույլ է տալիս ավարտել Բախմուտը շրջապատելու կամ թշնամուն դուրս մղելու գործողությունը»,-ասել էր Չերևատին:
Այնուամենայնիվ, ինչպես նշում է ուկրաինական Deep State-ը, թեև ուկրաինացի զինվորականները հաջողությամբ կտրել են Բախմուտ տանող երթուղիները հարավից, քաղաքը դեռևս կարող է մատակարարվել հյուսիսից:
Ընթացիկ տարվա հուլիսին Ուկրաինայի զինված ուժերի արևելյան խմբավորման հրամանատար Ալեքսանդր Սիրսկին նշել էր, որ Ուկրաինայի զինված ուժերի ռազմավարական նպատակն այս ուղղությամբ Բախմուտը շրջապատելն է։
Ներկայացնելով գյուղի ռազմավարական նշանակությունը BBC-ի ուկրաինական ծառայությանը նշում է, որ անմիջապես Կլեշչևկայի ծայրամասում կան բարձր բլուրներ, որոնք հնարավորություն են տալիս իրականում վերահսկել ոչ միայն Բախմուտը, որը գտնվում է հարթավայրում, այլև դեպի Գորլովկա տանող մայրուղին, որն անցնում է չորս կիլոմետր դեպի արևելք: Սա ռուսական կայազորի մատակարարման կարևոր ուղիներից է։
Եթե այն կտրվի, կմնա է Բախմուտից Պոպասնայա տանող ճանապարհը, ինչպես նաև Լիսիչանսկ տանող ճանապարհը, որը, սակայն, վտանգավոր է դարձել, քանի որ ուկրաինական զինված ուժերը հյուսիսից մոտեցել են այս մայրուղուն։
Ռուս ռազմական լրագրողները և թելեգրամյան ալիքները խոստովանում են, որ Կլեշչևկան, որն այդքան երկար պահում էր ռուսական բանակը, ընկած է։ Բայց նրանք հույս են հայտնում, որ ուկրաինացի զինվորականները բավարար ուժ չունեն առաջ շարժվելու համար։
