Ուկրաինային ԱՄՆ-ի օգնության նոր փաթեթը ներառում է սպառված ուրան պարունակող պարկուճներ

ԱՄՆ նախագահ Ջոզեֆ Բայդենի վարչակազմը չորեքշաբթի օրը հայտարարել է Ուկրաինային ռազմական օգնության նոր փաթեթի տրամադրման մասին։ Առաջին անգամ այն ​​կներառի Abrams տանկերի համար նախատեսված արկեր, որոնք կպարունակեն սպառված ուրան։ Բացի այդ, Պենտագոնը Ուկրաինային զինամթերք կմատակարարի HIMARS հրթիռային համազարկային կայանների, Javelin հակատանկային համակարգերի, մարտավարական կողմնորոշիչների, կապի համակարգերի և այլ սարքավորումների ու զինամթերքի համար: Փաթեթի ընդհանուր արժեքը կկազմի 175 մլն դոլար։

Սակայն, Պենտագոնի հայտարարությունը Վաշինգտոնի կողմից Կիևին տրամադրվող նոր օգնության փաթեթի փոքր մասն է: Նախօրեին Կիև պաշտոնական այցով ժամանած Էնթոնի Բլինքենը Ուկրաինայի արտգործնախարար Դմիտրի Կուլեբայի հետ համատեղ ասուլիսի ժամանակ հաստատել է, որ ԱՄՆ կտրամադրի ևս 1 միլիարդ դոլար արժողությամբ օգնության նոր փաթեթ:

Բլինքենը նաև հայտարարել էր, որ Վաշինգտոնն Ուկրաինային կփոխանցի բռնագրավված ռուսական ակտիվները։ Նա չի նշել այդ ակտիվների չափը և կոնկրետ երբ տեղի կունենա փոխանցումը, սակայն եթե տեղի ունենա, դա կլինի Վաշինգտոնի առաջին նման քայլը։

Սպառված ուրանը օգտագործվում է պարկուճների զրահաթափանցությունը մեծացնելու, ինչպես նաև տանկերի զրահաշերտերը ամրացնելու համար։ Այդուհանդերձ, Ուկրաինային նման զինամթերք մատակարարելու ծրագրերն արժանացել են Կրեմլի սուր քննադատությանը: Մոսկվան Բելառուսում միջուկային զենքի տեղակայումը նույնիսկ պայմանավորել է Մեծ Բրիտանիայի կողմից նման մատակարարումների պլանավորումով:

Ներկա պահին փորձագետների մոտ միանշանակ գնահատական չկա, թե որքան վտանգավոր կարող է լինել մարդու առողջության համար սպառված ուրանի օգտագործումը ռազմական նպատակներով։ 1991 թվականին Պարսից ծոցում և 1999 թվականին Կոսովոյում տեղ գտած մարտական ​​գործողությունների ժամանակ ԱՄՆ-ն օգտագործել է սպառված ուրան պարունակող արկեր և տանկային զրահներ: Հետագա ուսումնասիրությունների ժամանկ զինվորականների կամ տեղի բնակիչների հիվանդությունների և մետաղի այս տեսակի կիրառման միջև հստակ կապ չի հայտնաբերվել:

Սակայն, ՄԱԿ-ը և Ատոմային էներգիայի միջազգային գործակալությունը (ԱԷՄԳ) պահանջում են հրաժարվել դրա օգտագործումից։ Նրանք նշում են, որ սպառված ուրանը, բացի ռադիոակտիվ լինելուց, ծանր մետաղ է, որն ինքնին վնասակար է առողջության համար։ Բացի այդ, հողի աղտոտումը կխորացնի առանց այն էլ լուրջ բնապահպանական վնասը, որն արդեն հասցվել է Ուկրաինային պատերազմի պատճառով:

Նաև սեպտեմբերի 6-ին ԱՄՆ Սենատի երկու կուսակցությունների ներկայացուցիչները հավանություն տվեցին Ուկրաինային հետագա աջակցություն ցուցաբերելու ծրագրին:

«Մենք պետք է շարունակենք աջակցել Ուկրաինայում մեր ընկերներին, նույնիսկ ավելի շատ, քան նախկինում, քանի որ հակահարձակումը Պուտինի ուժերի դեմ եռում է», – ասել է Սենատի դեմոկրատական ​​մեծամասնության առաջնորդ Չակ Շումերը: Հանրապետականների առաջնորդ Միթչ Մաքքոնելն էլ կոչ է արել «շարունակել ներդրումները Ամերիկայի ռազմաարդյունաբերական բազայում»՝ աջակցելու Վաշինգտոնի գործընկերներին «այսօրվա պայքարում և օգնելու ուժերին զսպել վաղվա սպառնալիքները»:

Նախագահ Ջո Բայդենն օգոստոսին Կոնգրեսին խնդրել էր մինչև տարեվերջ հաստատել 40 միլիարդ դոլար լրացուցիչ ծախսեր, այդ թվում՝ 24 միլիարդ դոլար՝ Ուկրաինայի և այլ միջազգային կարիքների համար: Որոշումը պետք է կայացվի մինչև հոկտեմբերի 1-ը։