Վրաստանի իշխող կուսակցությունը իմպիչմենտի գործընթաց կսկսի նախագահ Սալոմե Զուրաբիշվիլիի նկատմամբ
Վրաստանը 2012 թվականից կառավարող «Վրացական երազանք» կուսակցության նախագահ Իրակլի Կոբախիձեն այսօր կայացած հատուկ ճեպազրույցում հայտարարել է, որ իշխող կուսակցությունը նախագահ Սալոմե Զուրաբիշվիլիի նկատմամբ իմպիչմենտի (անվստահության հայտնման) գործընթաց է սկսում՝ «երկրի սահմանադրության կոպիտ խախտման պատճառով»։
Կոբախիձեն մանրամասնել է, որ ի նկատի ունի պետության ղեկավարի Բեռլին կատարած այցը, որտեղ նախագահ Զուրաբիշվիլին հանդիպել էր Գերմանիայի Դաշնության նախագահ Ֆրանկ-Վալտեր Շտայնմայերի հետ։ Նախօրեին իշխող կուսակցության ղեկավարը մանրամասնել էր, որ Վրաստանի Հանրապետության սահմանադրության 52-րդ հոդվածի համաձայն՝ «նախագահն իր ներկայացուցչական գործառույթներն իրականացնում է միայն կառավարության համաձայնությամբ», իսկ նախարարների կաբինետը՝ վարչապետ Իրակլի Ղարիբաշվիլիի գլխավորությամբ, ըստ էության արգելել էին ոչ միայն այցելել Գերմանիա, այլ նաև Ուկրաինա, Շվեյցարիա, Լեհաստան, Բուլղարիա, Բելգիա, Չեխիա, Դանիա, Իսրայել և Արաբական Միացյալ Էմիրություններ։
Անձամբ Զուրաբիշվիլին բազմիցս բացատրել է եվրոպական մայրաքաղաքներ այցելելու անհրաժեշտությունը հոկտեմբեր ամսին Եվրոպական միության ղեկավարության կողմից Վրաստանին Եվրամիության անդամի թեկնածուի կարգավիճակի տրամադրման հավանականությամբ։ Բայց Վրացական երազանքի նախագահը այս փաստարկն անհիմն է համարում։ Ըստ Կոբախիձեի, նախագահը մի կողմից «փորձում է արժանին մատուցել եվրաինտեգրման գործին», իսկ մյուս կողմից՝ ԵՄ ղեկավարության կողմից «կանխել դրական որոշման ընդունումը»։
Միխաիլ Սաակաշվիլիի «Միացյալ ազգային շարժում» (ՄԱՇ) կուսակցությունը իշխող կուսակցությանը մեղադրել է «Մոսկվային հաճոյանալու համար եվրոպական ինտեգրացիան խաթարելու» մեջ։ ՄԱՇ -ի առաջնորդները նշում են, որ իշխող կուսակցությունը բացահայտ հարձակում է սկսել նախագահ Զուրաբիշվիլիի վրա անմիջապես այն բանից հետո, երբ Ռուսաստանի Դաշնության Անվտանգության խորհրդի փոխնախագահ, նախկին նախագահ Դմիտրի Մեդվեդևը, Սալոմե Զուրաբիշվիլին քննադատել էր Ռուսաստանի հետ առճակատման համար։ Միաժամանակ Մեդվեդևը բարձր էր գնահատել «Վրացական երազանք» կուսակցության գործունեությունը՝ Մոսկվայի հետ հարաբերություններում իր որդեգրած «պրագմատիկ գծի» համար։
Վրաստանի Սահմանադրության համաձայն՝ պետության ղեկավարի իմփիչմենթի գործընթացի մեկնարկի մասին հրապարակային հայտարարությունից հետո խորհրդարանական մեծամասնությունը պետք է դիմի երկրի Սահմանադրական դատարան։ Եթե հաստատվի, որ նախագահն իսկապես խախտել է հիմնական օրենքը՝ առանց կառավարության համաձայնության մեկնելով եվրոպական շրջագայության, խորհրդարանը կսկսի նախագահի իմպիչմենտի օրենքի քննարկումները, բայց դրա ընդունման համար անհրաժեշտ է 100 ձայն, այսինքն օրենսդիր մարմնի ներկայացուցիչների երկու երրորդի քվեն։ «Վրացական երազանք»-ն այս պահին խորհրդարանում ունի ընդամենը 78 մանդատ։
ՄԱԿ-ը և այլ ընդդիմադիր կուսակցությունները հայտարարել են, որ չեն աջակցի իմպիչմենտին, քանի որ Սալոմե Զուրաբիշվիլին գործում է սահմանադրության 78-րդ հոդվածի ոգուն և տառին համապատասխան, որը պարտավորեցնում է իշխանության բոլոր թևերին «անել հնարավորը ՆԱՏՕ-ին և ԵՄ-ին Վրաստանի ինտեգրման համար»:
