Համաշխարհային առողջապահության փորձագետների խումբն այսօր կհանդիպի՝ որոշելու, թե արդյոք Covid-19-ը դեռևս արտակարգ իրավիճակ է Առողջապահության համաշխարհային կազմակերպության կանոնների համաձայն: Այս կարգավիճակն օգնում է պահպանել միջազգային ուշադրությունը համաճարակի նկատմամբ։
ԱՀԿ-ն առաջին անգամ նշանակեց Covid-19-ի համաճարակի հետ կապված արտակարգ իրավիճակի ամենաբարձր մակարդակը 2020 թվականի հունվարի 30-ին, և այդ ժամանակվանից ի վեր փորձագետների հանձնաժողովը շարունակում էր կիրառել այդ կարգավիճակը երեք ամիսը մեկ տեղի ունեցող հանդիպումների ժամանակ:
Այնուամենայնիվ, մի շարք երկրներ վերջերս սկսել են չեղարկել իրենց ազգային արտակարգ դրությունը, օրինակ՝ Միացյալ Նահանգները:
ԱՀԿ-ի գլխավոր տնօրեն Թեդրոս Ադհանոմ Գեբրեյեսուսը հայտարարել է, որ հույս ունի այս տարի միջազգային արտակարգ դրությանը վերջ դնելու:
ԱՀԿ-ի խորհրդականների և արտաքին փորձագետների կարծիքով՝ դեռևս չկա կոնսենսուս, թե ինչպես կարող է հանձնաժողովը որոշում կայացնել։
«Հնարավոր է, որ արտակարգ դրությունը կարող է ավարտվել, բայց շատ կարևոր է տեղեկացնել, որ Covid-19-ը մնում է հանրային առողջության բարդ խնդիր»,- ասում է պրոֆեսոր Մարիոն Կուպմանսը՝ հոլանդացի վիրուսաբան, ով ԱՀԿ-ի փորձագիտական խմբի անդամ է:
Բանակցություններին մոտ կանգնած աղբյուրն ասել է, որ «միջազգային մտահոգություն առաջացնող հանրային առողջության արտակարգ իրավիճակ» դասակարգման հեռացումը կարող է ազդել համաշխարհային ֆինանսավորման կամ համագործակցության վրա: Մեկ այլ աղբյուր ասում է, որ վիրուսի անկանխատեսելիությունը դժվարացնում է այդ մարտահրավերն այս փուլում:
«Մենք դուրս չենք եկել համաճարակից, բայց մենք հասել ենք մեկ այլ հանգրվանի»,- ասում է պրոֆեսոր Սալիմ Աբդուլ Քարիմը, Covid-19-ի առաջատար փորձագետ, ով նախկինում խորհրդատվություն էր տալիս Հարավային Աֆրիկայի կառավարությանը կորոնավիրուսային արձագանքի վերաբերյալ: Պրոֆեսոր Քարիմը, ով ԱՀԿ փորձագիտական խմբի անդամ չէ, ասել է, որ անգամ եթե արտակարգ դրությունը չեղարկվի, կառավարությունները դեռ պետք է պահպանեն թեստավորման, պատվաստումների և բուժման ծրագրերը:
Մյուս փորձագետները ասում են, որ ժամանակն է ապրել Covid-ի հետ որպես առողջության մշտական սպառնալիք, ինչպիսին է ՄԻԱՎ-ը կամ տուբերկուլյոզը:
«Բոլոր արտակարգ իրավիճակները պետք է ավարտվեն»,- ասում է Լոուրենս Գոստինը, ԱՄՆ Ջորջթաունի համալսարանի իրավունքի պրոֆեսոր, ով հետևում է ԱՀԿ-ի աշխատանքին:
«Ես ակնկալում եմ, որ ԱՀԿ-ն վերջ կդնի միջազգային մտահոգություն առաջացնող հանրային առողջության արտակարգ դրությանը»,- ասել է նա, փոխանցում է Reuters-ը:
