ԼուրերՔաղաքականություն

ՀՀԿ-ում արձանագրել են «Պատիվ ունեմ» դաշինքի գոյության դադարումը. խորհրդարանական խմբակցությունը կղեկավարի Հայկ Մամիջանյանը

Հայաստանի Հանրապետական կուսակցության գործադիր մարմինը Ազգային ժողովի «Պատիվ ունեմ» խմբակցության ղեկավարի պաշտոնում առաջարկել է Հայկ Մամիջանյանի, իսկ խմբակցության  քարտուղարի պաշտոնում՝ Տիգրան Աբրահամյանի թեկնածությունները: Կուսակցությունն այս մասին հաղորդագրություն է տարածել:

Հուլիսի 11-ին տեղի է ունեցել կուսակցության գործադիր մարմնի նիստը, որի ընթացքում քննարկվել են կուսակցության գործունեության հետ կապված մի շարք հարցեր։

«Շեշտվել է կառուցվածքային ստորաբաժանումների հետ աշխատանքների ակտիվացման և ոլորտային կազմակերպությունների աշխատանքային ծրագրերը լիարժեք իրագործելու կարևորությունը։

Նիստին ներկայացվել է նաև ՀՀԿ արտաքին կապերի շրջանակներում միջազգային գործընկերների հետ տարվող աշխատանքների մասին ընթացիկ տեղեկատվությունը։

Քննարկվել է Ազգային Ժողովում Հանրապետական պատգամավորների հետագա գործունեությունը։

Ի գիտություն է ընդունվել «Հայրենիք» կուսակցության ղեկավարի հայտարարությունը «Պատիվ ունեմ» դաշինքից դուրս գալու մասին և արձանագրվել է դաշինքի գոյության դադարումը։

Հաշվի առնելով, որ նույնանուն խմբակցությունը Ազգային Ժողովում դեռևս գոյություն ունի և նրա ղեկավարի թափուր պաշտոնը իրավաքաղաքական գործընթացների ապահովման տեսանկյունից պետք է լրացնել, ՀՀԿ ԳՄ-ն առաջարկել է խմբակցության ղեկավարի պաշտոնում Հայկ Մամիջանյանի, իսկ քարտուղարի պաշտոնում՝ Տիգրան Աբրահամյանի թեկնածությունները»,- ասված է հաղորդագրության մեջ։

Հաղորդագրության մեջ նշվում է, որ վերահաստատվել է, որ կուսակցության խորհրդարանական գործունեության առանցքն եղել և մնում է իշխանությունների հեռացումը, ուստի թե խորհրդարանում, թե խորհրդարանից դուրս Հանրապետականը պատրաստ է համագործակցության այդ օրակարգը հետապնդող պատգամավորների, քաղաքական և հասարակական ուժերի ու գործիչների հետ։

Թեգեր
Ավելին

Հարակից նորություններ

Back to top button
Close