Ինձ համար նույնիսկ ուշացած է Վազգեն Մանուկյանի կոչերով քրեական գործի հարուցումը. Արուսյակ Ջուլհակյան

365news.am-ի զրուցակիցն է ԱԺ «Իմ քայլը» խմբակցության անդամ Արուսյակ Ջուլհակյանը

– Ռոբերտ Քոչարյանը ձեզնից ծնկաչոք ներողության է սպասում պատերազմում կրած պարտության համար: Պատրաստվո՞ւմ եք ծնկաչոք ներողություն խնդրել ժողովրդից:

– Ես նախ կառաջարկեմ պարոն Քոչարյանից հստակեցնել, թե ո՞վ էր ծրագրել այդ պարտությունը: Ինչ վերաբերում է ժողովրդից ներողություն խնդրելուն, ժողովրդին միջնորդներ պետք չեն՝ մանավանդ ի դեմս ամբաստանյալ Քոչարյանի: Մենք մեր քաղաքացիների և մեր ժողովրդի հետ բավականին արդյունավետ երկխոսություն կարողանում ենք ծավալել և մեր հարցերը մեր մեջ կլուծենք: Մենք կորոշենք՝ մեր ժողովրդի հետ ինչ է պետք անել, և ամբաստանյալ Քոչարյանին հորդորում եմ չխառնվել մեր հարաբերություններին:

– Ձեզ նաև մեղադրում են, որ ձեզ այլևս հետաքրքիր չէ Ղարաբաղի հարցը, որ այնտեղ ամեն ինչ որոշում է Ալիևը՝ ընդհուպ այն, որ Ալիևն արդեն որոշումներ է կայացնում Հայաստանի տարածքում, դիցուք՝ Զանգեզուրում:

– Ես, իհարկե, հասկանում եմ, որ իրենց ընդդիմություն հռչակած խմբերը երազում են այն մասին, որ Ալիևը որոշումներ կայացնի Արցախում, որ Ալիևը որոշումներ կայացնի նաև Հայաստանի Հանրապետությունում, բայց պետք է հիասթափեցնեմ իրենց՝ այդպես չի եղել ու չի լինելու:

– Երկու օր առաջ մեղադրանք առաջադրվեց ընդդիմության առաջնորդ Վազգեն Մանուկյանին: Ընդդիմությունն ասում է, որ դուք փորձում եք քաղաքական հետապնդման ենթարկել իրենց: Ինչո՞ւ եք քաղաքական հետապնդման ենթարկում:

– Գիտե՞ք՝ այս ամենը վաղուց արդեն զավեշտի է վերածվել, այդպիսի հայտարարությունները նոր բան չեն: 2018-ի հեղափոխությունից սկսած, երբ իրավապահների կողմից փորձ է արվել վերջապես արդարություն հաստատել այս երկրում, փորձ է արվել իրավապահների կողմից քայլեր ձեռնարկել այն ուղղությամբ, որ բոլոր այն հայտարարությունները հնարավոր հանցագործությունների մասին ստանան իրենց իրավական գնահատականները, այն անձինք, որոնք ներգրավվել են այս կամ այն գործով, ընդ որում՝ այդ գործերի մեծ մասը եղել են աղմկահայրույց գործեր՝ Մարտի 1, կոռուպցիոն հսկայական սխեմաներ, այդ անձինք որոշել են, որ մեկ էլ պետք է հայտարարեն, որ իրենք ենթարկվում են քաղաքական հետապնդման:

Իրավական գործընթացներ են սրանք շատ հստակ և քաղաքական հետապնդման տարր չկա ու չի կարող լինել: Ինչ վերաբերվում է ընդդիմության, այսպես կոչված, առաջնորդին, ես այդպես էլ չհասկացա՝ նա առաջնո՞րդ է, թե՞ առաջնորդ չէ, թե՞ ժամանակավորապես նրան տրվել է այդ հնարավորությունը հանդես գալ որպես առաջնորդ, և նա էլ համաձայնվել է, գոնե, մեկ օրով երկրի ղեկավար դառնալու վաղեմի մոլուցքի շրջանակներում, ինչ վերաբերում է նրա կոչերին, ինձ համար նույնիսկ ուշացած է այս քրեական գործի հարուցումը: Պարոն Մանուկյանը նոր չէ, որ սկսել է հանդես գալ նման կոչերով:

Դեռևս պատերազմի ժամանակ պարոն Մանուկյանը հայտարարություն էր տարածել և իր հայտարարությունն, ըստ էության, կարելի է գնահատել ռազմական հեղաշրջման կոչ, հետագայում նաև իր այլ հայտարարությունները, որ գազազած ամբոխը պետք է հոշոտի վարչապետին կամ ափսոսանք հայտնեց, որ չնայած այն բանին, որ պատերազմի ընթացքում զանգել է տարբեր գեներալների և կոչ է արել, որ նրանք ապստամբեն և իշխանություն վերցնեն: Մարդը խոստովանել է, որ ինքը փորձել է ՀՀ-ում կազմակերպել ռազմական հեղաշրջում և ափսոսանք է հայտնում, որ իր մոտ դա չի ստացվել:

Հետագայում նաև խոսում էր այն մասին, որ ապստամբելու է, ցայսօր Բաղրամյան պողոտայում խոսում է ապստամբելու մասին: Կոչ է անում բանակին ընդվզել: Սրանք վաղուցվանից պետք է ստանային իրենց իրավական գնահատականը: Բայց նաև պետք է նշել, որ սա էլ նոր բան չէ Վազգեն Մանուկյանի կյանքում, քանի որ Վազգեն Մանուկյանի բռնության հակված դրսևորումները տեսել ենք դեռևս 1996 թվականին, երբ նա իր հետևից գնացող ցուցարարներին առաջնորդեց դեպի ԱԺ և, ըստ էության, մարդկանց ուղղորդեց հարձակվել ԱԺ-ի վրա, որի հետևանքով բռնության ենթարկվեցին ԱԺ նախագահն ու փոխնախագահը: Նույն Վազգեն Մանուկյանն էր, որն արդարացնում էր Հոկտեմբերի 27-ը՝ նշելով, թե նրանք ինչ ահաբեկիչներ են, ընդամենը մի խումբ ռոմանտիկներ են:

Մենք նույն մարդու մասին ենք խոսում, և երբ նայում ենք նրա հետագծին, ես կդժվարանամ այն քաղաքական կոչել, որովհետև ինձ համար քաղաքական գործիչը չի կարող երբեք բռնության կոչերով հանդես գալ: Երբ նայում ենք նրա հետագիծը, տեսնում ենք, որ բռնությունը կարմիր թելի պես անցել է նրա գործունեության տարբեր փուլերով: Կարծում եմ, որ հանրության աչքից չի վրիպել այդ հանգամանքը և տվել է իր գնահատականը պարոն Մանուկյանին՝ 1996-ից հետո նրան այդպես էլ չաջակցելով:

– Նիկոլ Փաշինյանը նախաձեռնել է հանդիպումներ քաղաքական ուժերի հետ, որպեսզի քաղաքական կոնսուլտացիաների միջոցով հասնեն արտահերթ ընտրությունների: Ըստ Ձեզ՝ Վազգեն Մանուկյանի հետ նույնպե՞ս պետք է հանդիպի:

– Մենք՝ մեր քաղաքական ուժը, այդ թվում և վարչապետը, քանիցս նշել է, որ պատրաստ է հանդիպել և երկխոսել բոլոր այն քաղաքական ուժերի հետ, որոնք բացառում են բռնությունը իրենց մտածողությունից, քաղաքական հռետորաբանությունից: Իմ կարծիքով՝ Վազգեն Մանուկյանը քանի դեռ այս ոճում է, իսկ ես հույս չունեմ, որ նա կփոխի իր հռետորաբանությունը, նրա հետ պետք չէ հանդիպել: Բայց դա իմ կարծիքն է, վարչապետն ինքը կորոշի:

– Եթե, այնուամենայնիվ, այդ հանդիպումները չբերեն նրան, որ քաղաքական ուժերը համաձայնվեն արտահերթ ընտրությունների անցկացման այն պայմաններով, որոնք առաջարկում է Նիկոլ Փաշինյանը, ըստ Ձեզ, անկախ այդ ամենից՝ չպե՞տք է տեղի ունենան արտահերթ ընտրություններ:

– Այդ դեպքում մենք անպայման կքննարկենք և բոլոր հնարավոր ռիսկերը պետության համար կհաշվարկենք և կկայացնենք մեր որոշումը: Ես կարծում եմ, որ այս ընդհանուր լարվածությունը թոթափելու համար պետք են արտահերթ ընտրություններ, բայց եթե քաղաքական ուժերն արտահերթ ընտրությունների գնալու առումով կոնսենսուսի չգան, ես կարծում եմ, որ մենք պետք է հաշվարկենք այդ կոնսենսուսի բացակայության հնարավոր ռիսկերը, հետո վերջնական որոշում կայացնենք, քանզի եթե մեր նպատակը լարվածության թոթափումն է, ես ունեմ մտավախություն, որ այդ կոնսենսուսի բացակայության պայմաններում այդ լարվածությունը կարող է ավելի աճել: Հետևաբար պետք է լավ ծանրութեթև անենք և, ըստ իս, այդ քննարկումները պետք  է առողջ ուժերի հետ տեղի ունենան:

– «Իմ քայլում» հաշվարկո՞ւմ են այն ռիսկը, որ արտահերթ ընտրությունների պարագայում իշխող ուժի դեմ կարող են քվեարկել բանակը և Սյունիքի մարզը այն իմաստով, թե ովքեր են այնտեղ դրության տերը:

– Ես միշտ կարևորել եմ ժողովրդի մասնակցությունը մեր երկրում տեղի ունեցող իրադարձություններին: Եվ երբ մենք խոսում ենք այն մասին, որ Սյունիքում դրության տեր են նախկինները, ես ուզում եմ, որ մենք չշրջանցենք ժողովրդին և լսենք, թե ինչ է ասում Սյունիքում ապրող ժողովուրդը: Իսկ այնտեղ այնպես չէ, որ ունենք միատարր զանգված և միշտ չէ, որ նախկին կոչվածները կարողանում են ունենալ ազդեցություն:

Մենք սա նույնպես պետք է հաշվի առնենք: Ինչևէ: «Իմ քայլ»-ում բոլոր հնարավոր հանգամանքներն են քննարկվում և հաշվի առնվում ու մեր հիմնական նպատակն այն է, որ մենք երկիրը բերենք բնականոն հուն, այլ ոչ թե նոր ցնցումներ առաջացնենք մեր երկրի համար և ինչպես դա անել, կարծում եմ՝ ժամանակը ցույց կտա: Եվ դա մեծապես կախված է այս կոնսուլտացիաներից:

Զրուցեց Մհեր Արշակյանը