Վանեցյանի հայտարարությունը՝ կապված գերիների վերադարձի հետ, սովորական մանիպուլյացիա է․ կարծիքներ

ՀՀ ԱԱԾ նախկին տնօրեն Արթուր Վանեցյանն այսօր լրագրողների հետ զրույցում նշել է, որ իր իշխանության գալու պարագայում գերիների վերադարձը լինելու է մի քանի օրվա հարց։

Հայտարարության վերաբերյալ 365news.am-ը զրուցեց քաղաքագետներ Արմեն Բաղդասարյանի և Արմեն Վարդանյանի հետ։

Քաղաքագետները կարծում են՝ Վանեցյանի հայտարարությունը սովորական մանիպուլյացիա է։

«Ես չեմ կարծում՝ իրականում Արթուր Վանեցյանն ի վիճակի է իր անձնական կապերով լուծել այդ հարցը, բայց եթե ի վիճակի է ու չի լուծում, ուրեմն՝ դա նրա մասին շատ բացասական է խոսում»,- նկատեց Բաղդասարյանը։

Հարցին, թե ամեն դեպքում նախկին ԱԱԾ տնօրենը բոլորի առջև նման հայտարարություն է անում, ինչի՞ մասին է սա խոսում, Բաղդասարյանը պատասխանեց․ «Խոսում է նրա մասին, որ Վանեցյանը սովորական մանիպուլյացիաների է գնում՝ փորձելով ևս մեկ փաստարկ ներկայացնել, թե ինչո՞ւ պետք է գործող իշխանությունը հեռանա»։

Քաղաքագետ Արմեն Վարդանյանն էլ պնդում է, եթե Վանեցյանն ունի նման անձնական կապեր, կարող է հիմա էլ օգտագործել ու խնդրին լուծում տալ և ամենևին էլ կապ չունի, որ հիմա պետական պաշտոնյա չէ․ «Եթե նման կապեր ունի ու հարցը կարող է լուծել, ապա նման քայլն իր հեղինակությունը կբարձրացնի»։

Վարդանյանի խոսքով՝ փաստացի շատերն ասում էին, որ գերիների հարցը ՌԴ նախագահի անմիջական ուշադրության կենտրոնում է ու այնպես է ստացվում՝ Պուտինը չի՞ կարողանում լուծել խնդիրը, իսկ Վանեցյանը կարո՞ղ է․ «Այս ամենը զուտ մանիպուլյացիա է՝ քաղաքական դիվիդենտներ ձեռք բերելու համար»:

Անդրադառնալով ներհայաստանյան իրավիճակին՝ Բաղդասարյանը նշեց, որ այն, ինչ կատարվում է մեր երկրում, կարող է հանգուցալուծվել միայն ու միայն արտահերթ ընտրությունների միջոցով, քանի որ և՛ իշխանությունը, և՛ ընդդիմությունը գնում են առճակատման ու սա կարող է հանգեցնել քաղաքացիական պատերազմի, որն ուղղակի անթույլատրելի է։

Հարցին՝ արդյո՞ք երկիրն ու հասարակությունը պատրաստ են արտահերթ ընտրություններին, Բաղդասարյանը պատասխանեց․ «Երկիրն այլ ելք պարզապես չունի։ Ստեղծված ճգնաժամը որևէ կերպ պետք է հանգուցալուծվի, իսկ այդ հանգուցալուծման ամենախելամիտ տարբերակն արտահերթ ընտրություններն են։ Մենք ուրիշ ճանապարհ չունենք, ցանկացած այլ տարբերակ հղի է բախումներով և պետական ինստիտուտների կործանմամբ»։

Մելինե Պետրոսյան