Լուրեր

Կապահովվի համայնքային նշանակության ճանապարհների բարեկարգման ծրագրի արդյունավետ իրականացումը

Կառավարությունը լրացում է կատարել նախկինում ընդունած որոշումներից մեկում՝ համայնքային նշանակության, այդ թվում՝ գյուղական բնակավայրերի, ճանապարհների բարեկարգման ծրագրի արդյունավետ ապահովման և ՀՀ վարչապետի հանձնարարականների կատարման անհրաժեշտությամբ պայմանավորված: Ներկայում, համայնքային ճանապարհների բարեկարգման աշխատանքների մի մասն արդեն իսկ իրականացվում է համայնքների սուբվենցիոն ծրագրերի շրջանակում՝ պետության համատեղ մասնակցությամբ, համայնքային միջոցների ներգրավմամբ:

Ըստ հիմնավորման՝ դրանց համար ՀՀ կառավարության համապատասխան որոշմամբ ամրագրված ընթացակարգերը բարդ են, ժամանակատար և համայնքների սահմանափակ բյուջեների մասով կատարման համար ոչ ծախսարդյունավետ: Համայնքային ոչ առևտրային ու մասնավոր կազմակերպությունների պատվիրատվությամբ նմանատիպ աշխատանքների կատարումը դյուրին դարձնելու նպատակով առաջարկվում է՝ ոչ տարանցիկ, ՀՀ մարզերի համայնքներում տեղական նշանակության ճանապարհների սալարկման, խճապատման, երթևեկելի մասի և մայթերի բարեկարգման աշխատանքները դիտարկել, որպես ընթացիկ բնույթ կրող միջոցառումներ և ընդգրկել կառավարության որոշմամբ հաստատված ցածր ռիսկայնության աստիճանի (I կատեգորիայի) դասակարգում ունեցող օբյեկտների ցանկում, որոնց համար չի պահանջվի շինարարության թույլտվություն: 

Անդրադառնալով որոշմանը՝ Նիկոլ Փաշինյանը նշել է, որ բավականին երկար ժամանակ քննարկվել է գյուղական տեղական նշանակության ճանապարհների որակի լավարկման հարցը: 

«Գիտեք, ցավոք, որ մեր գյուղերում շատ փողոցներ ուղղակի հողային վիճակում են: Եվ մեզ համար ռազմավարական խնդիր է գյուղական համայնքներում կյանքի որակի փոփոխությունը»,- ընդգծել է վարչապետը՝ հավելելով, որ ընթացակարգերի դյուրացումը կնպաստի գործընթացի ավելի արդյունավետ իրականացմանը:

Թեգեր
Ավելին

Հարակից նորություններ

Back to top button
Փակել